حكايتي في سطور(بين حرمان الامومه وظلم المجتمع)

السلام عليكم
كيفكم اخواتي بصراحه هذه اول مره احاول انشر قصتي واتمنى من الجميع اخذ العظه والعبره وان الله مع الصابرين

البدايه يوم كان عمري 16 سنه رزقني الله بزوج طيب ابن حلال عشت معاه احلى حياه كان الكل حاسدنا على الحب اللي كان بينا الا انه الله لم يرزقني منه طفل ,,,

ماخلينا مكان مارحناه ولاعلاج مااخذته حيث اني كنت المسؤله عن عدم الانجاب بسبب تكيسات المبيض وضعف المبايض لين دلوني على دكتور في مركز مكه الطبي سابقا وبخش حاليا بمكه قال لي موضوعك بسيط عملية ليزر على المبيض وتحملي ان شاء الله

انا فرحت وسويت العمليه ومر شهر ..شهرين ..سنه وانا حتى الدوره ماعاد تجيني لا بعلاج ولا بغيره وكل مااسال الدكتور يقول شي طبيعي!

عموما بعد سنه رحت لعيادة الدكتور عباس للعقم وشرحت له حالتي وقال لازم اعمل لك عملية منظار عشان اشوف وش سوى الدكتور قلت له يادكتور انا سويت 5 مرات عملية المنظار غير العمليه الاخيره حقت الليزر, لكنه اصر ان يعملها فتوكلت على الله .

وفعلا سويت العمليه وثاني يوم جاني عشان يقولي النتايج وكانت الصدمة اني صرت عقيم بسبب ان الدكتور السابق حرق المبيض بالليزر وسبب لي بالتصاق الامعاء بالمبايض...

ماقلت وقتها غير حسبي الله ونعم الوكيل وبكيت وزوجي التزم الصمت!!

مايأست انا وزوجي وصرت ادور علاج بكل مكان وهو صابر معي الا ان اصيبت امه بمرض السرطان والعياذ بالله
وانشغلنا فيها ومن حبي بزوجي كنت انام تحت رجلين امه بالمستشفى واشيل البول من تحتها عرفانا بصبره وحبه لي

ثلاث شهور وانا على هالحال الا ان طلعت امه من المستشفى وحنا عندها قالت لزوجي المراه اللي ماتجيب عيال مامنها رجا !
ياانا يازوجتك صرت ابكي اقولها لاحرام عليكي ماقدر اعيش من غيره ارحميني وهو يقولها يمه حرام تكفين قالت هي كلمه ماراح ارجع عنها يطلقك ويتزوج عشان يجيب عيال!

قلت لها خليه يتزوج ولا ابيه يصرف علي ولاياخذ لي شقه بقعد ببيت اهلي بس لايطلقني خله يطل علي كل فتره والثانيه ,, قالت لا واستغلت حب ولدها لها ومرضها فإنه ينفذ اوامرها او تغضب عليه دنيا واخره !

طلقني طلقه قالت لا حرمها بكى زوجي وبكيت وطلقني بعد عشره دامت 9 سنوات !!

ورجعت بيت اهلي مكسوره مجروحه وبدأت معي رحلة الاحزان....

يتبع وللحديث بقيه